SÃMO SPÕMENI
Tȉka tȁka bãtil je lerõj
i švȇra je denôvo pasãla švȇru
va kantunȕ kantãlo se i pȋlo
brȋžni onõh ki ne zna svojȕ mẽru
Igrãli su kãrti
i hȉtali šȉja šȅte
trepetãve rȗki vinȍ su prolevãle
brȋžni onõh ki prȅt tũjimi vrãti pomẽta
Nôć se je obernȕla
tẽpli krȕh je zavonjãl
va kantunȕ barba Tône sedĩ
pȋpu fumâ i pomãlo pensâ
da je još fcȇra pȅlna kȕća bilȁ
a sada na ognjĩšću ognjȁ nĩ
i va sȅrcu je zimȁ
Ma brȋžni je onõh šlovȅk
ki do živjẽnja sãmo spõmeni ȉma
Avelina Damijanjević Draguzet
(akcentuacija: Bernard Balon)
